La serie TV

La serie si divît in trê parts (musiche, arts visivis e arts performativis) par un totâl di 15 documentaris curts di 13’ ognidun.

I protagoniscj de prime serie a son i musiciscj des ultimis gjenerazions. I artiscj coinvolzûts a rapresentin gjenars musicâi diferents e a metin insiemi plui elements di interès, che a van dal virtuosisim esecutîf ae origjinalitât dai tescj, de vocazion a contâ de lôr tiere, ae capacitât di cjapâ dentri il public dilunc des esibizions.

La seconde serie e je dedicade ai protagoniscj de creativitât in lenghe furlane tal ambit des arts visivis. A son ilustradôrs, esperts di grafiche cul computer, fumetiscj, fotografs, scultôrs, artiscj a ducj i efiets.

La tierce serie e je dedicade ai protagoniscj des arts performativis: teatri, danze contemporanie, performances e arts dal circ, in particolâr i zûcs di manipolazion. A son artiscj che a crein spetacui cu la vôs, cui moviments dal cuarp, che a doprin i struments dal circ, che a fasin spetacui di strade.

Ogni episodi si presente tant che un puzzle di riflessions, pinsîrs e confessions dal protagonist cu lis personis plui impuartantis de sô vite privade e professionâl: la sô infanzie e il rapuart cu la lenghe mari, cemût che e je nassude la passion pe art, la relazion tra il so interès artistic e chel dai familiârs.

Planc a planc, o scuvierzìn il contest sociâl e culturâl dulà che al è cressût e cemût che la passion si è trasformade in profession. Lu viodìn te sô vite di ogni dì, a contat cun familiârs, amîs, coleghis. Tocs di dialics che nus dan rispuestis implicitis a cualchi domande: trop isal complès esprimi la creativitât intune lenghe minoritarie? Cemût vegnino acetadis lis oparis di bande dal public locâl? E fûr de sô tiere? La lenghe determinie une sensibilitât diferente rispiet a chei altris artiscj? Cemût si compagnino lis lidrîs culturâls cu la necessitât di contaminazion e inovazion? Cualis sono lis prospetivis pal avignî?

La produzion creative e ven contade cun piçui detais: lis mans, lis espressions de muse, i “struments di lavôr”, la cure pal particolâr.

Regjie Dorino Minigutti
Sogjet Dorino Minigutti, Giorgio Cantoni
Diretore de fotografie Debora Vrizzi
Assistent aes ripresis Francesco Snidero
Fonic Francesco Morosini, Havir Gergolet, Marco Cecotto
Montaç Andrea Guarascio
Assistents al montaç Lorenzo Fabbro, Luca Fornasiero
Fotografe di sene Rebecca Colle
Musichis AAVV
Ricercjis Giorgio Cantoni
Direzion di produzion Gabriella Ziraldo
Assistente di produzion Anna Di Toma
Web Remigio Guadagnini / Altreforme
Social web Elena Buzzinelli, Sergio Floriani
Produzion Agherose s.r.l.

Cu la poie dal Fonts pal Audiovisîf dal Friûl-Vignesie

Progjet finanziât de ARLeF