Il progjet
Un efiet no secondari dal inseriment tai plans de ufierte formative de scuele taliane des dissiplinis leadis al spetacul, ae creativitât, aes arts in sens larc (musiche, cine, teatri, television, audio, fotografie) al è dal sigûr chel di “semenâ” sul percors formatîf tradizionâl ocasions di incuintri cun figuris di artiscj che dispès a vegnin identificadis come che a fossin di une dimension cuasi mitiche, lontanis dal mont reâl. Al è impuartant che la scuele e creedi lis cundizions par che un zovin in etât evolutive, ae ricercje di une proprie dimension esistenziâl, al puedi cjatâ un autôr, une opare di art, al puedi jessi cjapât dentri intun operâ, concret, scuvierzi atitudins e passions… par che i zovins a viodin intal audiovisîf, intes ativitâts e intai savês conetûts une ocasion significative di cressite professionâl e di iniziative culturâl e imprenditoriâl, intune dimension che e je coletive in maniere struturâl e e domande une ativitât di relazion, promozion, sinergjie, coordenament fra mistîrs diviers, in plui che fra arts e dissiplinis.
La propueste
VORE CREATIVE al vûl creâ une ocasion di orientament scolastic e professionâl indreçade ae imprenditorialitât culturâl zovine.
Midiant cualchi pontade de serie INT/ART e il sucessîf incuintri cui siei protagoniscj, si intint ancje sensibilizâ i zovins al ûs de lenghe minoritarie, la lenghe mari dai artiscj protagoniscj, e ai valôrs de identitât culturâl furlane intai diviers contescj artistics.
Il progjet al è indreçât ai students de scuele secondarie di II grât e ai students dal ultin an de scuele secondarie di l grât.
La presince dai protagoniscj de serie televisive e da la oportunitât di coinvolzi figuris professionâls de produzion artistiche furlane tant che testemonis – e tal stes timp promotôrs – di contignûts cualificâts. La oportunitât di une relazion interpersonâl, la etât e la visibilitât mediatiche dai testemonis a facilitin intai stu-dents une tension empatiche e une ricjadude positive in tiermins motivazionâi.
Chest moment di incuintri al pues risultâ di grant interès pai students, sedi par un orientament professionâl che di studis universitaris. Chest al vâl ancje pai students dal ultin an des scuelis mediis inferiôrs, orientâts viers un percors scolastic cun direzion artistiche.
Il program al previôt un incuintri di cirche 2 oris cui students. Inte prime part e je previodude la proiezion di trê/cuatri pontadis de serie TV, dopo al sarà un incuintri cul protagonist di une des pontadis e il regjist de serie.
Par vie dal COVID, si pues organizâ l’incuintri cui professioniscj midiant videoconference.
DOTAZION NECESSARIE:
Aule di podê scurî furnide di videoproietôr, computer, conession a internet e cassis acustichis adatis.
