Inzegnîr e musicist jazz, baterist rafinât in stât di sunâ sedi ai concierts dal Quirinâl a Rome, sedi tai piçui clubs di provincie, la personalitât di chest musicist si pues meti in struc intune frase: tal jazz, come ancje te vite, sbaliâ ritmi al pues deventâ un at creatîf.
La vôs tant che strument di une passion che e dure di dute une vite. Teatri e musiche a contat cu lis espressions artistichis plui impuartantis de nestre epoche e cuntune formazion une vore salde le àn puartade a jessi une des cjantantis e interpretis di musiche popolâr e culte plui ricercjadis a nivel internazionâl.
Dai prâts de Cjargne ai palcs dal hip hop metropolitan, il Dek nol à mai dismetût di contâ de sô int e des traversiis de sô tiere di origjin, cuntune scletece e une fuarce che a restin unichis. Storiis di paîs deventadis poesie di strade, dulà che ducj i zovins a puedin ricognossisi.
La carateristiche principâl di cheste zovine cjantante e je chê di pandi, cu la scletece de sô vôs, une apartignince totâl al mont de art, dedicantsi anime e cuarp. Une particolaritât che tancj musiciscj di alt nivel a sintin, adun cuntun public atent, che al presee dute la sô profonditât.
Inventôr di storiis peadis al mont che al sa di sâl de Basse furlane, storiis cussì incredibilis che a somein veris. Chest atent osservadôr de realtât che i sta dulintor, al rive a imbombî i tescj des sôs cjançons cu la essence profonde de gjenerazion dai furlans de sô etât, e a trasformâle, cun ironie e inzen, intune materie leterarie inedite.
Fotografe
A son cierts moments dulà che i moviments dai cuarps e lis espressions de muse a fevelin un lengaç che dome la fotografie e rive a esprimi. Il sens de ricercje di Alice al sta propit in chest, e chi al è ancje l’obietîf dal so lavôr tal mieç de int intun conciert o intes manifestazions popolârs de sô tiere. Une oportunitât di cognossince e di curiositât dal mont che i sta intor.
Ilustradore
E je une dissegnadore e une grafiche cuntun segn carateristic; e colabore cun gjornâi e e cree ilustrazions, cuviertinis dai discs e grafichis par grups musicâi, events e festivals. Tal stes timp e sune ancje il bas eletric cun perizie e maestrie, e e cjape sù un mont intîr di riferiments che a deventin imagjins simbolichis e significativis dal mont furlan di vuê.
Scultôr
Inventôr di formis e di sugjestions che a vegnin de fuarce des sôs visions, risultât di une sedimentazion lente di esperiencis e di storiis vivudis. Dal aspiet salvadi e naturâl des gjavis antighis, la piere che lui al lavore e pues deventâ cualsisei robe. E podarà jessi une astronâf aliene che e devente un bucrani, o une fantasime de infanzie pierdude che e torne a vivi intun piçul pâr di scarputis di marmul blanc, o ancje…
Fumetist
Al rive a inventâ monts intîrs cu la bielece des sôs taulis e cu la maestrie de grafiche al computer. A son lûcs che a vegnin di altris timps e di gjeografiis imagjinariis, però familiârs par chei che ju cjalin. Cheste e je une carateristiche dai lavôrs di Luca che, insiemi cu la sô scuadre, al puarte i letôrs in paîs lontans e di fantasie, dulà che o podìn ricognossi il profîl des monts, lis architeturis severis dai cjistiei e lis sfumaduris dai lâts dal so Friûl.
Artist visîf
Te sô ricercje al dopre in maniere ecentriche i ogjets pui stranis, eletrodomestics, zuiatui e altris materiâi di ogni dì, dulà che i procès automatics o mecanics a vegnin evidenziâts e rindûts paradossâi. I siei lavôrs a son un banc di prove dulà che si met in discussion la potenzialitât de machine. Il plui des voltis, a son l’erôr, la variabile, la prove, che a deventin la costante uniche dal so lavôr.
Atore e regjiste
Prontâ un spetacul di teatri nol è dome un lavôr inteletuâl ma e covente ancje une preparazion fisiche. Aida lu à imparât in chescj agns midiant dal so lavôr costant di racuelte ator pal mont di storiis che no àn vôs, scognossudis o dismenteadis. A son storiis di oms e di feminis che a segnin il so percors di ricercje teatrâl, intim e personâl. Ce che al ven puartât ae atenzion dal public a son lis peraulis, il movisi e il cjalâ dai protagoniscj, adun cun dute la lôr profonde umanitât.
Dramaturg
Cuntun voli di simpri critic e une esperience decenâl di consulence artistiche, Anna e je simpri daûr a cirî la cualitât e il perfezionament di tescj, di spetacui e di programs teatrâi. Cheste ativitât le puarte indenant sedi dentri dal sisteme dai teatris stabii todescs, sedi in contescj plui specifics tant che la dramaturgjie furlane. Il so lavôr si fonde sul cjalâ cun atenzion i mecanisims umans: une risorse cuasi infinide inte creazion di ogni lengaç artistic dal dì di vuê.
Artist di circ
Dôs a son lis naturis di Davide: une profonde e riflessive, in graciis de sô lauree in filosofie, e une plui lizere e creative, che e imbrace il mont artistic. Al à imparât di bessôl la tecniche dal ecuilibrisim e de manipolazion dai ogjets, e al è stât un dai pionîrs di cheste art intal mont furlan, dulà che al è stât bon di ripuartâ e di meti in vore dut ce che al à imparât tes scuelis ator pal mont. Il so al è un vêr lavôr di artesan, dome che invezit dai materiâi al dopre i cuarps e i moviments di acrobats e di gaugars.
Atôr teatrâl
Il talent comic al è un talent naturâl e gjenetic, no si pues imparâlu cu la tecniche. Chest al è ce che Federico al à imparât fasint la academie di teatri. Achì al à podût perfezionâ la sô capacitât naturâl di jentrâ in sintonie cul public che al à denant, massime cui fruts. Al è impegnât cun produzions indipendentis, ma tal stes timp nol mole di fâ cors di teatri cun fruts di scuelis elementârs e mediis: cun lôr al dopre la lenghe furlane in maniere creative, divertente e sorprendente.
Balarine e coreografe
Cuant che la art e je une passion che ti cjape dal dut e la musiche la sô incarnazion plui vere, il bal al devente une urgjence di espression, une reson di vite. Al è li che il cuarp al devente strument musicâl di ricercje, di sperimentazion, di studi. E cussì, balâ al è une perlustrazion infinide tra gjenars, contaminazions, lengaçs, dissiplinis. Martina e je une balarine, performer e insegnante.